Д-р Тодорче Јосев

• Оваа година започнува со работа дијагностичкиот центар на Систина Офтламологија во Штип каде што и Вие ќе бидете дел од тимот на доктори. Што значи таков ангажман ?

Голем професионален предизвик е да се биде дел од еден ваков тим. Во новиот дијагностички центар ќе имаме различни процедури и начини за детални и комплетни прегледи. Ќе работиме со целата популација, буквално, од најмладите до највозрасните и тоа сите видови на прегледи. Најсовремената апаратура и тим на доктори кои ќе вршиме прегледи очекувам да вроди плод во дијагностирањето и лекувањето на пациентите од овој регион.

Посветеноста и постојаната доедукација се најважни кога се соочувате со професионални предизвици.

• Досега работевте во сферата на јавното здравство. Ќе ви помогне ли тоа искуство во натамошниот тек на кариерата ?

Почнав со работа на ургентниот центар во болницата „8 ми септември“, потоа работев како доктор во брзата помош, следеше  специјализација на Клиничкиот центар  „Мајка Тереза“ и четири години работа во  Медицинскиот центар во Свети Николе. Искуството со пациентите и со институциите во сферата на јавното здравство има и позитивни и негативни аспекти.  Најважна е желбата да им се помогне на пациентите и приодот во таа насока.  Позитивните искуства на пациентите за мене беа и остануваат најважни, и тогаш, но и сега , кога продолжувам со кариерата во најуспешната очна болница во Македонија.

• Важите за добар дијагностичар. На основа на што се поставува добра дијагноза ?

На основа на медицинско знаење и на прецизна апаратура за работа.  Технологијата и апаратурата со која располага болницата се најдобрата поддршка за секој дијагностичар.  Секако, важно е и стекнатите знаења да се надградуваат, да се следат новите светски трендови и искуства.

• Кога е најдобро пациентите да дојдат на преглед и каков?

Најдобро е барем еднаш годишно да се направи детален преглед по можност со ширеење на зеници каде што детално може да се види и предниот и задниот сегмент на окото и детално да се утврди состојбата на окото како и точниот диоптер доколку го има. За разлика од редовните годишни прегледи лица кои имаат одредени системски заболувања (како на припер дијабетесот) многу е значајно да доаѓаат редовно односно на помал временски период на секои 4 до 6 месеци и да ја следат состојбата на своите очи. Со редовните прегледи се важни бидејќи со нив може да се превенира и на време да се откријат промените и соодветно да се реагира.

Секако, секогаш сите оние кои ќе осетат некакви симптоми различни од вообичаеното како на пример промени во видното поле, намалување на видот, искривена слика, сенка и сл., треба да се јавуват на преглед. 

• Каков е прегледот на пациент со дијабетес. Какви испитувања треба да се направат ?

Прегледот почнува со одредување на видната острина, мерење на очен притисок, ширење на зениците за да се види леќата и задниот сегмент, екографија, OЦТ , да се утврди дали има макуларен едем или не.  Многу е важно да се следи состојбата, затоа што може брзо може да еволуира.

• Каква треба да биде комуникацијата со пациентот пред да му се постави дијагнозата ( за таа да биде успешна )?

Најважно за пациентот е да биде опуштен кога се дијагностицира болеста. Докторот не треба да се постави авторитативно, напротив, пријателски.  Важно е на разбирлив начин да му објасни на пациентот, за каква болест се работи и што може да очекува во процесот на лекување.  Внимателно треба да се сослуша пациентот,  да се разберат симптомите, емоциите и маката што ја има.  Ако се почувствува разочараност или депресивност, треба да се надминат тие емоции, со образложение дека лекувањето секако е состојба која води кон подобрувањето на состојбата.

• Како реагираат пациентите кога ќе ја чујат дијагнозата?

Пациентите различно реагираат. Имаат различни емоции и очекувања.   Нормално е, секој  кој е подложен на болничко испитување,  да се плаши од конечниот исход.  Но кога ќе го разберат целиот процес,  пациентите стекнуваат доверба во докторот, стануваат посмирени и лесно влегуваат во процесот на лекување.

• Што правите во слободно време?

Читам книги, слушам музика, гледам филмови. Многу често одам на прошетки со ќеркичката.  Возиме точаци и ролери. Убави ни се заедничките моменти, разговараме и се шегуваме.

• Која книга би ни ја препорачале ?

Делата на Стивен Кинг.  Кога специјализирав, си поставив цел, да ги прочитам, сите.

• Каква музика слушате ?

Рок.  Rolling Stone, Deep Purple, Led Zeppelin …

• За кој филм можете да кажете дека ви е омилен ?

Форест Гамп и Зелената миља  – базирана на новела на Стивен Кинг.