Птоза е медицински израз за спуштен капак. Пациент што има птоза не е во можност целосно да го отвори окото, бидејќи горниот капак ја покрива зеницата.

Интервенцијата за корекција на птоза се изведува под локална анестезија, така што пациентот си оди дома истиот ден и следува многу брзо закрепнување. Иако процедурата кај децата е иста, потребно е да се направи под општа анестезија.

Птозата може да се појави подоцна во животот ако мускулите или лигаментите кои вообичаено го креваат очниот капак се ослабени поради повреда или болест. Понекогаш спуштањето е резултат на оштетување на нервите кои ги контролираат мускулите на очните капаци.

Повеќето птози се случуваат само со стареењето. Како што старее човекот, кожата и мускулите на очните капаци се протегаат и слабеат. Понекогаш, претходната операција на очите ја забрзува оваа промена, бидејќи инструментите што се користат за одржување на окото отворено за време на операцијата може да го истегнат очниот капак.

• Симптоми

Може да биде присутна уште при раѓањето на детето, па затоа се вика вродена и настанува поради грешки во развојот додека детето сè уште е во мајчината утроба. Ако детето се роди со птоза што оневозможува нормално гледање, потребно е да се изврши колку што е можно поитна операција, бидејќи детското око нема да се развива и ќе остане слабовидно целиот живот.

Стекнатата птоза кај возрасните настанува како последица на повреди или дегенеративни старечки промени на мускулите и тетивите на капаците предизвикани со стареењето.

Симптоми за спуштен капак кај деца и возрасни:

• Видлив спуштен капак на едното око
• Горните капаци на двете очи не се еднакви
• Ја навалува главата наназад, ја подига брадата или ги подгнува веѓите за да може подобро да гледа.

Со текот на времето, овие движења може да предизвикаат проблеми со главата и вратот.

Понекогаш, дете родено со птоза може да има и други проблеми поврзани со очите. Тие може да вклучуваат проблеми со движењето на очите, болести на очните мускули, тумори (на очниот капак или на друго место) и други проблеми.

Ако очниот капак на детето падне толку многу што го блокира видот, може да се развие амблиопија (исто така наречена „мрзливо око“). Едното око ќе има подобар вид од другото. Исто така може да развие и астигматизам (цилиндер), како и да се појави страбизам (искривување) на очите.

Кај лицата кои страдаат од хронично суво око, хипертензија, нарушувања на циркулацијата, нарушувања на тироидната жлезда, дијабетес или срцеви заболувања доколку нивната состојба е регулирана и е стабилна, се кандидати за оваа интервенција.

Кај лицата со миастениа гравис постои можност за реоперација.

Се прави преглед за окулопластика да се провери состојбата на капаците и видот.

По потреба може да се направат и дополнителни дијагностички испитувања како испитување на видно поле за да се утврди дали има слепи точки во периферниот вид.

Се прават и фотографии за да се следи резултатот пред и по интервенцијата.

На самиот преглед разговарате со офталмологот за резултатот кој сакате да го постигнете од интервенцијата и колку е тој возможен во вашиот случај, односно реално што може да очекувате.

Предоперативната подготовка трае околу 20 минути. Пациентите со хронични болести,  во зависност од терапијата која што ја примаат, имаат посебни подготовки за кои се информирани на денот на закажување на операцијата.

Подготовката ја започнува медицинската сестра при што се зема анамнеза. Се проверува крвен притисок и шеќер. Потоа во консултација со офталмологот доколку има потреба се прават дополнителни дијагностички испитувања.

Откако пациентот ќе биде целосно подготвен се внесува во операциона сала.

Интервенцијата се изведува со локална анестезија. По потреба, може да се изведе со општа анестезија при што претходно се прави анестезиолошки преглед.

Изборот на интервенцијата зависи од видот и степенот на птозата. Ако мускулот што го подигнува капакот (levator palpebrae) има сочуван дел од функцијата, операцијата се врши со негово скратување. Ако случајно тој мускул нема доволно сочувана функција, капакот со посебна постапка се врзува со мускулите на челото што ја преземаат функцијата на капакот (т.н. brow suspension).

Операцијата на птоза се изведува под локална анестезија со седација (пациентот е буден, но не ја чувствува процедурата).Иако процедурата кај децата е иста, потребно е да се направи под општа анестезија. Видовите на операција за поправка на спуштен капак го вклучуваат следново:

• Хирургот прави отвор во кожата на горниот очен капак. Ова му овозможува на хирургот да го пронајде малиот мускул што го крева очниот капак. Хирургот става шевови за да го затегне овој мускул и да го подигне очниот капак. Засекот на кожата на очниот капак потоа се затвора со повеќе конци.

• Хирургот може да ја изврши целата операција од под очниот капак. Во овој случај, очниот капак е превртен и мускулот е затегнат одоздола. За овој пристап не е потребен засек на кожата.

Операција на птоза може да се направи заедно со блефаропластика. Блефаропластиката е операција со која се отстранува вишокот на кожа на очните капаци која може да придонесе до спуштање на очниот капак.

По интервенцијата, следниот ден е првата контрола, после една недела и месец дена.

На пациентот му се препишува терапија (антибиотски/кортикостериодни капки и маст) и е должен да ја користи согласно временскиот период назначен од офталмологот.

Пожелно е да се спие со главата на повисока перница неколку дена, и да се носат темни очила за да се заштити кожата од сонцето и ветерот.

Очекувано е да се појават модринки и оток кој се намалува полека од 10 до 14 дена. Потребно е неколку месеци за лузни од хирушките засеци целосно да избледат. Во одредени случаи оваа интервенција може да има потреба да се направи повторно.

Ограничувањата по корекција на птоза се привремени и не траат долго и секогаш се согласно препорака на хирургот.

Во првите неколку дена по операцијата, треба да се избегнува миење на лице со обична вода и триење на окото и првиот месец да се избегнува потешки напори како и кревање на тешки предмети. Особено е важно редовно и правилно да се користи пропишаната терапија.

Исто така не треба да се носат контактни леќи две недели по интервенцијата.

Најчесто спортските активности вообичаено се дозволени веќе по 2-3 недели по операцијата, во зависност од возраста на пациентот и интензитетот на вежбање.

Медицинскиот персонал е достaпен 24/7 за било каква консултација која е потребна по операцијата.

Пакетот вклучува: интервенција со локална анестезија, три контролите и терапијата.

Постои можност да се плаќа на рати без камата и дополнителни трошоци.

Повеќе за начинот на плаќање може да проверите на актуелниот ценовник на Систина Офталмологијa