ОЦТ (оптичка кохерентна томографија) претставува неинвазивен тест со слики кој користи светлосни бранови за да направи пресек на сите слоеви на ретината.  Ова снимање не го зрачи окото.

Тоа му овозможува на офталмологот да ја мапира ретината и да ја дефинира нејзината дебелина и структура, прикажувајќи ги сите нејзини слоеви што многу помага во иден третман кај пациентите со глауком и болести на ретината како дијабетичната ретинопатија  и макуларната дегенерација. 

Структурата на ретината е важна за да се утврди дали таа е нормална и здрава или пак има одредени промени. Ако ретината е истенчена тоа е знак за атрофија, доколку е здебелена тоа е знак за едем (оток).

ОЦТ (оптичка кохерентна томографија) е корисен за дијагностицирање на многу состојби на очите како:

• макуларна дупка;
• макуларна мембрана;
• едем на макулата;
• макуларна дегенерација поврзана со возраста;
• глауком;
• воспалнија и отоци на очниот нерв;
• централна серозна ретинопатија;
• дијабетична ретинопатија;
• влечење на ретината од страна на  стаклестото тело;
• тромбози на ретината;
• инфекции на ретината и воспаленија од неинфективен карактер.

ОЦТ често се користи да се оценат и нарушувања на очниот нерв. ОЦТ снимање му помага на офталмоогот да види промена на влакната на оптичкиот нерв. На пример, може да забележи промени кои асоцираат на глауком. 

При изведувањето на ОЦТ со вас е оптометрист/медицинска сестра.

Пред ОЦТ анализа, офталмологот може да побара да се прошират зениците, но и не мора. Проширувањето на зеници се врши со капки. 

Со проширени зеници полесно се гледа ретината во окото (задниот дел од окото).

Потоа ќе ве седнат пред ОЦТ апаратот и ќе ја потпрете главата на потпора за да биде стабилна и без движења. Апаратот ќе го скенира вашето око без да го допре. Ова скенирање трае од 2 до 3 минути. 

Ако вашите зеници се проширени може да се сензитивни на светлина и да ви е заматен видот неколку часа по снимањето.

ОЦТ не се користи доколку пациентот има зрела (густа) катаракта или значително крварење во стаклестото тело (во задниот дел на окото) бидејќи тие ја попречуваат светлината да помине низ окото и да ја сними ретината.

ОЦТ е снимање кое нема зрачење, односно функционира со светлосни бранови.

Постои можност да се плаќа на рати без камата и дополнителни трошоци.

Повеќе за начинот на плаќање може да проверите на актуелниот ценовник на Систина Офталмологија.